“Zamin” Beynəlxalq İctimai Fondunun nümayəndə heyəti Əmək və Əhalinin Sosial Müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzinə tanışlıq səfəri edib. Səfər zamanı Mərkəz ilə “Zamin” Beynəlxalq İctimai Fondu arasında əməkdaşlıq imkanları müzakirə edilib. Əmək və Əhalinin Sosial Müdafiəsi Nazirliyinin Beynəlxalq əlaqələr şöbəsinin müdiri İradə Usubova ölkəmizdə həssas əhali qruplarından olan şəxslərin sosial müdafiəsinin gücləndirilməsi, maddi təminatının yaxşılaşdırılması ilə bağlı icra olunan layihələr, aparılan sosial islahatların beynəlxaq səviyyədə yüksək qiymətləndirilməsindən danışıb. Bildirilib ki, Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Leyla Əliyevanın iştirakı ilə 22 oktyabr 2021-ci il tarixində açılışı olan Mərkəzin yaradılması bu kateqoriyalardan olan istedadlı şəxslərin yaradıcılıq potensialının inkişafına dəstək məqsədi daşıyır. DOST İnklüziv İnkişaf və Yaradıcılıq Mərkəzinin direktor vəzifəsini icra edən Mətanət Məmmədova qurumun fəaliyyəti, inklüziv cəmiyyətin inkişafına dəstək istiqamətində həyata keçirilən layihələr haqqında ətraflı məlumat verib. Qeyd olunub ki, fəaliyyəti müddətində müəssisədə cəmiyyətin sosial cəhətdən həssas qruplarının, o cümlədən əlilliyi olan şəxslərin inteqrasiyası, yaradıcılıq imkanlarının genişləndirilməsi məqsədi ilə əhəmiyyətli tədbirlər görülüb. İnklüziv inkişafın bölgələrdə təşviqinə dəstək olaraq Mərkəzin İsmayıllı rayonunda “DOST EVİ” filialı yaradılıb və digər bölgələrdə də bu tipli müəssisələrin açılması üçün iş aparılır.

“Zamin” Beynəlxalq İctimai Fondunun Beynəlxalq Əlaqələr Departamentinin rəhbəri Gülasal Yusupova Özbəkistanın dayanıqlı inkişafı və əhalinin həyat səviyyəsinin yüksəldilməsinə dəstək göstərilməsi, ətraf mühit və sosial sahədə qurumun həyata keçirdiyi layihələr barədə məlumat verib. Görüşdə müxtəlif yaradıcılıq istiqamətləri və sosial dəstək xidmətləri üzrə mümkün birgə layihələr və addımlar barədə fikir mübadiləsi aparılıb. Birinci vitse-prezident Mehriban Əliyevanın təşəbbüsü ilə yaradılan Mərkəzin cəmiyyətin bütün təbəqələri arasında bərabər imkanlar yaradılması sahəsində xüsusi əhəmiyyət kəsb etdiyi vurğulanıb.

Sonra qonaqlar Mərkəzin fəaliyyəti ilə daha yaxından tanış olmaq üçün yaradıcılıq studiyalarına baş çəkib, təlim prosesini izləyiblər. Benefisiarların təlimçilərlə birlikdə ərsəyə gətirdikləri əl işlərinə baxıblar. Nümayəndə heyətinə Mərkəzdə təlim alan həssas kateqoriyalara aid şəxslərin ölkəmiz üçün əhəmiyyətli tədbirlərdə, o cümlədən COP29-a hazırlıq prosesində fəal iştirakı və ətraf mühitin mühafizəsi təşəbbüsləri barədə məlumat verilib. Mərkəzdə təlim prosesinə cəlb olunmuş istedadlı şəxslərin “Yaşıl dünya naminə həmrəylik ili” çərçivəsində ərsəyə gətirdikləri əl işlərindən ibarət ekspozisiya qonaqların marağına səbəb olub.