Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradcılıq Mərkəzinin benefisiarları üçün bank işi, menecment, informasiya texnologiyaları üzrə təlimlərə start verilib. Mərkəzin 30-a yaxın benefisiarının cəlb olunduğu təlimlər Azərbaycan Dövlət İqtisad Universitetində (UNEC) fəaliyyət göstərən İnklüziv Təhsil Mərkəzi ilə əməkdaşlıq çərçivəsində ali təhsil ocağının pedoqoji heyəti tərəfindən həyata keçirilir. Məqsəd sosial baxımdan həssas əhali qruplarından olan şəxslərin dövrün tələblərinə uyğun peşə istiqamətlərinə yönləndirilməsi, bu sahədə onların bacarıqlarının aşkarlanmasıdır. Təlimlər həftədə 3 dəfə DOST İnklüziv İnkişaf və Yaradıcılıq Mərkəzinin 4 saylı DOST Mərkəzindəki guşəsində təşkil olunur. Qeyd edək ki, tərəflər arasında qarşılıqlı təcrübə mübadiləsini, bu xüsusda müştərək layihələr və innovativ təşəbbüslərin təşkili ilə bağlı birgə fəaliyyəti əhatə edən memorandum imzalanıb.