Yeni Azərbaycan Partiyasının (YAP) Nəsimi rayonu, “Cavadxan küçəsi 13” ünvanı - Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzində ərazi partiya təşkilatı təsis edilməsi ilə bağlı iclas olub.

İclas 14 iyul 1969-cu il Ümummilli Lider Heydər Əliyevin Azərbaycanda birinci dəfə siyasi hakimiyyətə gəlməsi ilə əlaqədar, “Heydər Əliyev İli" çərçivəsində təşkil olunub.

YAP Nəsimi rayon təşkilatının sədri Azər Süleymanov Ulu Öndər Heydər Əliyevin 14 iyul 1969-cu ildə Azərbaycanda birinci dəfə siyasi hakimiyyətə gəlməsi ilə respublikamızın həyatında inkişaf dövrünün başlandığını qeyd edib.

Bildirilib ki, 1992-ci il noyabrın 21-də Naxçıvanda Heydər Əliyevin sədrliyi və 550 nəfərdən ibarət təşəbbüs qrupunun iştirakı ilə yaradılan Yeni Azərbaycan Partiyası bu gün Prezident İlham Əliyevin rəhbərliyi ilə ölkəmizin aparıcı siyasi qüvvəsinə çevrilib. Partiya sıralarında birləşən yüzminlərlə vətəndaş qarşıya qoyulan öhdəlikləri uğurla yerinə yetirərək, dövlətçiliyimizə, azərbaycançılıq ideologiyasına sədaqətlə xidmət edir.

Təşkilat sədri Nəsimi rayonu üzrə 105 ərazi partiya təşkilatının qeydiyyata alındığını və yeni təsis edilən ərazi partiya təşkilatının bu istiqamətdə işlərə dəstək olacağını vurğulayıb.

DOST İnklüziv İnkişaf və Yaradıcılıq Mərkəzinin direktor müavini Nigar Məmmədova  Birinci vitse-prezident Mehriban xanım Əliyevanın təşəbbüsü ilə yaradılan mərkəzin fəaliyyəti barədə məlumat verib. Qeyd olunub ki, Mərkəzin 40-dan artıq əməkdaşı YAP-a üzv olmaq üçün müraciət edib. Bu isə Heydər Əliyev irsinə rəğbətin, dövlət başçısının həyata keçirdiyi siyasi kursa inamın ifadəsidir.

Çıxışlardan sonra səsvermə keçirilib və “Cavadxan küçəsi 13” ərazi partiya təşkilatı təsis edilib.  DOST İnklüziv İnkişaf və yaradıcılıq Mərkəzinin direktor müavini Nigar Məmmədova ərazi partiya təşkilatının sədri, Elvin İbrahimov isə sədr müavini  seçilib. Ərazi partiya təşkilatının seçilmiş sədr və sədr müavini göstərilmiş etimada görə təşəkkürlərini bildiriblər.