Yeni Azərbaycan Partiyasının İsmayıllı rayon təşkilatının nümayəndələri DOST İnklüziv İnkişaf və Yaradıcılıq Mərkəzinin İsmayıllı “DOST Evi” filialı ilə tanış olublar.

İnfoturda YAP İsmayıllı rayon təşkilatının sədri Zaur Muradov, partiya üzvləri, eləcə də rayonun digər idarə, müəssisə və təşkilatlarının nümayəndələri iştirak ediblər.

İsmayıllı “DOST Evi” filialının direktoru Faiq Xudanlı müəssisənin fəaliyyəti və əsas istiqamətləri barədə qonaqlara məlumat verib. Bildirilib ki, burada həssas əhali qruplarından olan şəxslərin yaradıcılıq imkanlarının genişləndirilməsi, bacarıqlarının təkmilləşdirilməsi və sosial aktivliyinin artırılması məqsədilə müxtəlif proqram və təşəbbüslər həyata keçirilir.

Eyni zamanda, iştirakçılara xidmətlərdən yararlanma mexanizmi, qəbul prosesi və göstərilən dəstək növləri haqqında məlumat verilib. Vurğulanıb ki, həyata keçirilən fəaliyyətlər benefisiarların cəmiyyətə inteqrasiyasına və onların özünüreallaşdırmasına mühüm töhfə verir.

İnfotur çərçivəsində qonaqlar yaradıcılıq emalatxanalarında təşkil olunan təlimlərlə yaxından tanış olub, əl işlərinə baxıblar.