Azərbaycanda səfərdə olan Vyetnamın Siyasi İdarəetmə və İnkişaf Strateji İnstitutunun direktoru xanım Le Nguyen Thien Nga Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzi ilə tanış olub.
 

Mərkəzin direktoru Elnarə Ənsari qonağı Mərkəzin xidmət istiqamətləri barədə məlumatlandırıb. 
 

Bildirilib ki, Birinci vitse-prezident Mehriban Əliyevanın təşəbbüsü ilə yaradılan Mərkəz əlilliyi olan şəxslərin, şəhid ailəsi üzvlərinin, digər həssas qrupların yaradıcı potensialının inkişafına və cəmiyyətə təqdim olunmasına xidmət  edir.  
 

İnklüziv cəmiyyətin inkişafına mühüm töhfə verən və həssas qruplarla iş sahəsində innovativ yanaşmaları ilə seçilən müəssisədə və filiallarında hazırda 220-dən çox benefisiarın müxtəlif fəaliyyət sahələri üzrə bacarıqlarının təkmilləşdirilməsi və sosial adaptasiyası istiqamətində işlər aparılır.
 

Xanım Le Nguyen Thien Nga Mərkəzdə hazırlanan əl işlərindən ibarət sərgi və təlim prosesini, təlimçi və benefisiarların təqdim etdikləri konsert proqramını izləyib. 
 

O, DOST İnklüziv İnkişaf və Yaradıcılıq Mərkəzi, burada aparılan işlərlə bağlı müsbət təəssüratlarını diqqətə çatdırıb.
 

Mərkəzdə Xanım Le Nguyen Thien Nga ilə keçirilən görüşdə həssas qrupların cəmiyyətə inteqrasiyasının gücləndirilməsi sahəsində təcrübə mübadiləsi və mövcud əməkdaşlıq imkanları nəzərdən keçirilib.
 

Vyetnamın Siyasi İdarəetmə və İnkişaf Strateji İnstitutunun rəhbəri təəssüratlarını Mərkəzin xatirə albomunda qeyd edib.