Əmək və Əhalinin Sosial Müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzində "Uşaq Hüquqları Aylığı" ilə əlaqədar maarifləndirici təlimlər keçirilib. Təlimlərə həssas əhali qruplarına aid 18 yaşınadək əlilliyi müəyyən edilmiş şəxslər, eyni zamanda xüsusi qayğıya ehtiyacı olan uşaqların valideynləri və ya qəyyumları cəlb edilib. Uşaqların özünümüdafiə mexanizmlərinin daha yaxşı aşılanması məqsədi ilə təlim prosesində praktiki məlumatlar interaktiv oyun formatında təqdim olunub. İştirakçılara “Uşaqların özünümüdafiəsi və şəxsi zona anlayışı”nın, 18 yaşadək əlilliyi müəyyən edilmiş şəxslərin valideynlərində yaranan stress amilləri və onlarla psixoloji işin əhəmiyyəti, uşaqlarda özünü göstərən problemli davranışlar, onların səbəbləri, valideyn-övlad münasibətlərinin optimallaşdırılmasına dair mövzularda müzakirələr aparılıb. 
 
Məlumat üçün bildirək ki, Birləşmiş Millətlər Təşkilatı (BMT) tərəfindən “Uşaq hüquqları haqqında” Konvensiyanın qəbul edilməsinin 35-ci ildönümü ilə əlaqədar Azərbaycan Respublikasının İnsan Hüquqları üzrə Müvəkkili (Ombudsman) tərəfindən hər il olduğu kimi 20 oktyabr-20 noyabr tarixləri ölkədə “Uşaq Hüquqları Aylığı” elan edilib. Məqsəd uşaq hüquqlarının müdafiəsi və təbliği sahəsində fəaliyyətin gücləndirilməsi, uşaqlara diqqət və qayğının təşviqi, bu sahədə məlumatlılığın artırılmasıdır.