Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin təşkilatçılığı ilə Ukraynadan ölkəmizə gətirilən uşaqlar Nazirliyin tabeliyindəki DOST İnklüziv İnkişaf və Yaradıcılıq Mərkəzinin İsmayıllı DOST Evi filialında olublar.

Qəbələ Uşaq Reabilitasiya Mərkəzində tibbi, eləcə də sosial-psixoloji reabilitasiya xidmətləri ilə təmin edilən uşaqlar filialın yaradıcılıq emalatxanaları ilə tanış olub, fəaliyyəti barədə məlumatlandırılıblar. 

 İnfotur çərçivəsində qonaqlar dulusçuluq, rəssamlıq, bədii oyma və digər sənətkarlıq istiqamətləri üzrə master-klaslarda iştirak edərək öz bacarıqlarını nümayiş etdiriblər.

İnfotur iştirakçıları həyətyanı ərazidə ağacəkmə təşəbbüsünə də qoşulublar.  Onlar üçün mədəni-əyləncəli proqramlar təşkil olunub.

Sonra Mədəniyyət Nazirliyinin tabeliyindəki Dağlıq-Şirvan Regional Mədəniyyət İdarəsinin musiqiçilərinin iştirakı ilə musiqi proqramı təqdim olunub.