Ölkəmizdə səfərdə olan Türkiyə Respublikasının Sosial Müdafiə Qurumunun (Sosyal Güvenlik Kurumu) İnformasiyaTexnologiyaları Baş İdarə rəisinin müavini Adnan Yılmazın rəhbərlik etdiyi nümayəndə heyəti Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzi ilə tanış olub.

       Tanışlıq zamanı Mərkəzin direktor müavini Mətanət Məmmədova qonaqlara müəssisənin fəaliyyəti və xidmət istiqamətləri, inklüzivliyin təşviqi məqsədilə görülmüş işlər barədə məlumat verib.

       Birinci vitse-prezident Mehriban Əliyevanın təşəbbüsü ilə yaradılan Mərkəzdə həssas əhali qruplarına aid vətəndaşların yaradıcılıq potensialının üzə çıxarılması və cəmiyyətin fəal üzvlərinə çevrilməsi üçün lazımi şərait mövcuddur.

       Hazırda Mərkəz və filiallarında benefisiarlara müxtəlif yaradıcılıq istiqamətləri üzrə peşə vərdişləri aşılanmaqla yanaşı, sosial-psixoloji dəstək xidmətlərinin göstərildiyi bildirilib.

       Mərkəzdə xidmətlərə cəlb olunmuş vətəndaşların iqtisadi fəallığını təmin etmək məqsədilə "dostart.az" elektron satış portalının istifadəyə verildiyi vurğulanıb. Bölgələrdə yaşayan həssas kateqoriyalara aid müəlliflərin gəlir imkanlarını artırmaq üçün Qarabağ və İsmayıllı “DOST Evi”ndə hazırlanan əl işlərinin portal vasitəsilə satışı təmin edilib.

       Tanışlıq çərçivəsində qonaqlar Mərkəzin təlim studiyalarında yaradıcılıq prosesini izləyib, həmçinin onlara əl işlərindən ibarət sərgi və musiqi nömrələri təqdim olunub.