Türkiyə ilə Azərbaycan Gənclər və İdman Nazirlikləri arasında həyata keçirilən “Gənclər mübadiləsi” Proqramları çərçivəsində ölkəmizə səfər edən nümayəndə heyəti Əmək və Əhalinin Sosial Müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzi ilə tanış olub. Türkiyənin Gənclər və İdman Nazirliyinin gənclərlə iş sahəsinə məsul şəxsləri və gənclərdən ibarət heyət Mərkəzin yaradıcılıq studiyalarında təlim prosesini izləyib, həmçinin həssas qruplarla aparılan işlər barədə məlumatlandırılıblar. Səfər çərçivəsində qonaqlar xalçaçılıq, bədii oyma, dulusçuluq və digər istiqamətlər üzrə təşkil olunan master-klaslara qoşulub, bacarıqlarını göstəriblər. Nümayəndə heyətinin üzvləri Mərkəzdə hazırlanan sənət nümunələrinə, o cümlədən "Yaşıl dünya naminə həmrəylik ili" çərçivəsində təlimçilər və benefisiarların birlikdə ərsəyə gətirdikləri əl işlərindən ibarət ekspozisiyaya baxıblar. Qeyd edək ki, layihə Azərbaycan-Türkiyə Hökumətlərarası Birgə İqtisadi Komissiyasının 11-ci iclasının Fəaliyyət Planının müddəalarının,Türkiyə - Azərbaycan gənclər və idman sahəsində əməkdaşlıq İşçi Qrupunun 2-ci iclasının Protokolunun müddəalarına əsasən yerinə yetirilir.