Zirə Mədəniyyət Mərkəzinin Eko Park ərazisində yerləşən “Türk dünyası” rəsm qalereyasında Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzinin "DOST ART" sərgisi açılıb.

Açılış tədbirində Əmək və Əhalinin Sosial Müdafiəsi Nazirliyinin Aparat rəhbərinin müavini Nihad Muxtarlı, DOST Agentliyinin İdarə Heyəti sədrinin müavini Aygün Musayeva, əməkdar artist Bəhram Bağırzadə, Nazirliyin strukturuna daxil olan qurumların nümayəndələri, şəhid ailələri üzvləri, ictimaiyyət nümayəndələri iştirak ediblər.

"Türk Dünyası" Rəssamlıq Akademiyasının prezidenti, xalq rəssamı, professor Sakit Məmmədov ekspozisiyada nümayiş etdirilən sənət nümunələrinin sonsuz xəyal gücü və əzmin təntənəsi olduğunu vurğulayıb. O bu əl işlərinin Mərkəzin istedadlı təlimçi və benefisiarlarının daxili aləmini əks etdirdiyini qeyd edib.

DOST İnklüziv İnkişaf və Yaradıcılıq Mərkəzinin direktoru Elnarə Ənsari Birinci vitse-prezident Mehriban Əliyevanın təşəbbüsü ilə yaradılan Mərkəzdə həssas qrupların bacarıqlarının inkişaf etdirilməsi, onların yaradıcılıq nümunələrinin cəmiyyətə təqdim edilməsi, beynəlxalq miqyasda tanıdılması üçün üçün aparılan işləri diqqətə çatdırıb.

Sərgidə Mərkəzin təlimçi və benefisiarlarının bədii oyma, təsviri incəsənət, floristika, keramika, xalçaçılıq, dərzilik, bədii tikmə üslublarında hazırlanmış 250-dən çox əl işi təqdim edilir.

Ekspozisiya ilə tanışlıqdan sonra “Türk Dünyası” Rəssamlıq Akademiyasının prezidenti tərəfindən müəlliflərə təşəkkürnamələr verilib. Sərginin təşkilinə və cəmiyyətdə inklüzivliyin təşviqinə göstərilən dəstəyə görə Sakit Məmmədova xüsusi təşəkkürnamə və hədiyyə təqdim olunub.

Mərkəzin musiqiçilərinin ifasında inklüziv konsert proqramının da təqdim edildiyi sərgi martın 7-dək davam edəcək.