Heydər Əliyev Fondunun təşəbbüsü, “Təmiz Şəhər” ASC-nin təşkilatçılığı, IDEA İctimai Birliyi, “İçərişəhər” Dövlət Tarix-Memarlıq Qoruğu İdarəsi və “Q Gallery” incəsənət qalereyasının dəstəyi ilə IX Beynəlxalq “Tullantıdan sənətə” sərgisi keçirilib. Mərkəzimizin Dulusçuluq istiqaməti üzrə təlimçisi Cahan Namazova “Yaşıl dünya naminə həmrəylik ili”nə həsr olunmuş “Həyatın əsası” adlı əsəri ilə layihədə iştirak edib. Müəllif istifadəyə yararsız eko və bio materiallardan istifadə edərək hazırladığı əsərində ekoloji mövzulara diqqət çəkir. Yer kürəsinin hər bir canlı varlığın Evi olduğuna, planetimizin gələcəyi naminə canlı təbiətin zənginliyini və harmoniyanı qorumağın vacibliyi fikirlərini rəmzi obrazlarla ifadə edir. Qeyd edək ki, ənənəvi olaraq keçirilən “Tullantıdan sənətə” sərgisində bu il 9 müxtəlif ölkələdən dəvət olunan 12 xarici və 18 yerli sənət adamı “Sülh üçün yarat” mövüzusunda tullantılardan və lazımsız hesab edilən əşyalardan düzəltdikləri incəsənət nümunələrini nümayiş etdiriblər. “Yaşıl dünya naminə həmrəylik ili”ndə və Azərbaycanda keçiriləcək COP29-a hazırlıq öncəsi ətraf mühitin mühafizəsinə xidmət edən bu təşəbbüsə dünyanın fərqli ölkələrindən qoşulan yaradıcı şəxslər əsərlərinin məzmununda ekoloji problemlərin aradan qaldırılması ilə yanaşı sülhə çağırış edirlər.