“SOCGOV 2025: Süni intellekt insan və transformasiya üçün” adlı beynəlxalq konfransda iştirak etmək üçün ölkəmizdə səfərdə olan Serbiyanın ailə rifahı və demoqrafiya naziri xanım Yelena Zariç, Moldovanın Milli Sosial Sığorta Kassasının direktoru xanım Yelena Tsıbırne, Türkiyənin əmək və sosial müdafiə nazirinin müavini Ahmet Aydının rəhbərlik etdiyi nümayəndə heyətləri Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzində olublar.

Əmək və əhalinin sosial müdafiəsi nazirinin müavini Anar Bayramov qonaqlara ölkəmizdə həssas qrupların yaradıcı potensialının dəstəklənməsi üçün aparılan işlər barədə məlumat verərək, Mərkəzin inklüziv cəmiyyətin inkişafına verdiyi töhfələri diqqətə çatdırıb.

Qeyd olunub ki, Birinci vitse-prezident Mehriban Əliyevanın təşəbbüsü ilə yaradılmış Mərkəzdə həssas qruplardan olan şəxslərin bacarıqlarının təkmilləşdirilməsi istiqamətində davamlı işlər həyata keçirilir. İnklüzivliyin təşviqi məqsədi ilə Mərkəzin bölgələrdə filialları da fəaliyyət göstərir.

Qonaqlar Mərkəzin fəaliyyəti, burada əlilliyi olan şəxslər və digər həssas qrupların yaradıcı potensialının inkişafı üçün aparılan işlərlə tanış olublar.

Təlim studiyaları, yaradıcılıq prosesi və hazırlanan sənət nümunələri qonaqlarda xoş təəssüratlar yaradıb. Beynəlxalq konfransın iştirakçılarına Mərkəzin benefisiarlarının ifasında konsert proqramı təqdim edilib. Qonaqlar Mərkəzin xatirə kitabına ürək sözlərini yazıblar.