Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzinin direktor müavini Elbrus Allahverdiyev şəhid Ravil Hümbətovun ailəsini ziyarət edib.

R.Hümbətov hərbi xidmətini başa vurduqdan sonra könüllü olaraq Silahlı Qüvvələrdə müddətdən artıq hərbi qulluqda olub, hərbi kurslarda iştirak edərək leytenant rütbəsi alıb. Bütün çətin təlimlərdə nümunəvi hərbçi kimi fərqlənərək komandanlığın rəğbətini qazanan qəhrəman 44 günlük Vətən müharibəsində şücaətlər göstərib.  

O, 2022-ci il sentyabrın 12-də Ermənistan Silahlı Qüvvələri tərəfindən törədilən genişmiqyaslı təxribatın qarşısının alınması zamanı şəhid olub.

Vəzifə borcunu şərəflə yerinə yetirdiyinə görə R.Hümbətov Prezident İlham Əliyevin Sərəncamları ilə “Azərbaycan Bayrağı” ordeni və “Vətən uğrunda” medalı ilə tətif edilib.

Şəhidin ailəsi sosial dəstək tədbirləri ilə əhatə olunub, ailəsi Əmək və Əhalinin Sosial Müdafiəsi Nazirliyi tərəfindən mənzillə təmin olunub.

Görüşdə Mərkəzin xidmət kateqoriyaları və istiqamətləri barədə məlumat verilib. Şəhidin övladlarının müxtəlif fəaliyyət sahələri üzrə təlimlərə cəlb olunması ilə bağlı təklif edilib.

Görüşdə bütün şəhidlərimizin xatirəsinin qəlblərdə əbədi yaşayacağı vurğulanıb.