Əmək və Əhalinin Sosial Müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzinin direktor müavini Elbrus Allahverdiyev Novruz bayramı ərəfəsində Vətən müharibəsi şəhidi Nurlan Nadir oğlu Həsənovun ailəsini ziyarət edib.

Görüşdə şəhidin keçdiyi döyüş yolu və şücaətindən danışılıb.

Qeyd olunub ki, Şuşada dünyaya göz açan və körpə yaşlarından məcburi köçkünlük həyatı yaşamış Nurlan Həsənov 2020-ci il sentyabrın 27-də torpaqlarımızın işğaldan azad edilməsi və ərazi bütövlüyünün bərpa olunması uğrunda döyüşlərə qatılıb. O, Cəbrayıl və Füzulinin azadlığı uğrunda gedən döyüşlərdə savaşıb. Azərbaycan Ordusunun leytenantı olan Nurlan Həsənov oktyabrın 1-də Füzuli rayonu istiqamətində gedən döyüşlər zamanı şəhid olub. Prezident İlham Əliyevin Sərəncamları ilə "Vətən uğrunda", “Cəsur döyüşçü”, "Cəbrayılın azad olunmasına görə", "Xocavəndin azad olunmasına görə","Füzulinin azad olunmasına görə" medalları ilə təltif olunub.

Mərkəzin direktor müavini Elbrus Allahverdiyev şəhid ailələrinin sosial təminatının yaxşılaşdırılması istiqamətində həyata keçirilən dəstək tədbirlərindən danışıb. Prezident İlham Əliyev və birinci xanım Mehriban Əliyeva tərəfindən şəhid ailələrinə və qazilərə göstərilən qayğıdan söhbət açılıb. 

Görüşdə şəhidlərimizin ailə üzvlərinin, yadigarlarının hər birimiz üçün dəyərli olduğu, onların döyüş yolunun qəhrəmanlıq nümunəsi kimi xalqımızın hafizəsində hər zaman minnətdarlıqla xatırlanacağı bildirilib. Şəhid ailələrinə göstərilən sosial dəstək tədbirlərinin bundan sonra da davam etdiriləcəyi vurğulanıb.