Əmək və Əhalinin Sosial Müdafiəsi Nazirliyinin tabeliyində DOST İnklüziv İnkişaf və Yaradıcılıq Mərkəzinin direktor müavini Mətanət Məmmədova Novruz bayramı ərəfəsində şəhid Fizuli Əliyevin ailəsini ziyarət edib. 2020-ci il oktyabrın 8-də Suqovuşan uğrunda gedən döyüşlərdə şəhidlik zirvəsinə ucalan Fizuli Əliyev Prezident İlham Əliyevin sərəncamı ilə “ 3-cü dərəcəli Rəşadət” ordeni, “Vətən uğrunda”, “Suqovuşanın azad olunmasına görə” medalları ilə təltif olunub. Silahlı Qüvvələrin qurulması və möhkəmləndirilməsində fəal iştirakına görə “Azərbaycan Ordusunun 100 illiyi (1918-2018)”,“Azərbaycan Respublikası Silahlı Qüvvələrinin 90 illiyi (1918-2008) və “Azərbaycan Respublikası Silahlı Qüvvələrinin 95 illiyi (1918-2013) yubiley” medallarına layiq görülüb.

Qeyd olunub ki, şəhid ailələrinin sosial-məişət şəraitinin yaxşılaşdırılması istiqamətində görülən dəstək tədbirləri çərçivəsində şəhid Fizuli Əliyevin ailəsi dövlət qayğısı ilə əhatə olunub. Şəhidin ailəsi Əmək və Əhalinin Sosial Müdafiəsi Nazirliyi tərəfindən mənzillə təmin olunub, aylıq sosial ödənişlər təyin edilib. 

Söhbət zamanı şəhid Fizuli Əliyevin keçdiyi döyüş yolu, 44 günlük Vətən Müharibəsində göstərdiyi şücaətdən danışılıb. Bildirilib ki, şəhidlərimizin qəhrəmanlıq hekayəsi bundan sonrakı gələcək nəsillər üçün örnəkdir, vətənpərvərlik ruhunda yetişməsi üçün mühüm mənbədir. Onların xatirəsini xalqımız dərin hörmətlə anır, daima əziz tutur. 

Allah bütün şəhidlərimizə rəhmət eləsin!