Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzinin direktoru Elnarə Ənsari tarixi Zəfərimizlə yekunlaşan Vətən müharibəsində şəhid olmuş Mirzəyev Elçin Maqsud oğlunun ailəsini ziyarət edib.

Tərtər–Ağdərə–Suqovuşan istiqamətində gedən döyüşlərdə qəhrəmanlıq göstərərək şəhidlik zirvəsinə ucalan Elçin Mirzəyev Prezident İlham Əliyevin Sərəncamları ilə “Vətən uğrunda”, “Laçının azad olunmasına görə” və “Suqovuşanın azad olunmasına görə” medalları ilə təltif edilib. Şəhidin ailəsi dövlət tərəfindən sosial dəstək tədbirləri ilə əhatə olunub və ailəyə hər ay sosial ödənişlər edilir.

Görüşdə şəhidin keçdiyi şərəfli döyüş yolundan, onun igidliyi və vətənpərvərliyindən bəhs edilib. Şəhidlərimizin müqəddəs xatirəsinin xalqımızın qəlbində daim yaşayacağı, onların həyat yolunun gənc nəsil üçün vətənə sədaqət və mərdlik nümunəsi olduğu vurğulanıb.

DOST İnklüziv İnkişaf və Yaradıcılıq Mərkəzinin fəaliyyəti haqqında da məlumat verilib. Şəhid Elçin Mirzəyevin övladları Əsma və Aylinlə söhbət zamanı onların da Mərkəzə cəlb edilməsi ilə bağlı fikir mübadiləsi aparılıb.