Əmək və Əhalinin Sosial Müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzinin direktor vəzifəsini icra edən Elnarə Ənsari şəhid Cavidan Nizami oğlu İbrahimlinin ailəsini ziyarət edib.

44 günlük Vətən müharibəsində Füzuli rayonunun işğaldan azad edilməsi uğrunda aparılan döyüş əməliyyatları zamanı şəhidlik zirvəsinə ucalmış Cavidan İbrahimli Prezident İlham Əliyevin Sərəncamları ilə "Vətən uğrunda", “Xocavəndin azad olmasına görə”, “Füzulinin azad olunmasına görə” medalları və III dərəcəli “Vətənə xidmətə görə” ordeni ilə təltif olunub.

Görüşdə şəhidin keçdiyi döyüş yolundan, onun vətənə olan sevgisindən bəhs edilib. Qeyd edilib ki, dövlət başçısının tapşırığına əsasən şəhid ailələri və müharibə veteranları sosial dəstək tədbirləri ilə əhatə olunub. Şəhid Cavidan İbrahimlinin ailəsinə də sosial ödənişlər təyin edilib, Əmək və Əhalinin Sosial Müdafiəsi Nazirliyi tərəfindən şəhidin ailəsi mənzillə təmin olunub.

Şəhid ailələrinə göstərilən sosial dəstək tədbirlərinin bundan sonra da davam etdiriləcəyi vurğulanıb.

Görüşdə DOST İnklüziv İnkişaf və Yaradıcılıq Mərkəzinin fəaliyyəti və xidmət istiqamətləri barədə məlumat verilib. Şəhidin ailə üzvlərinin Mərkəzdəki təlimlərə cəlb olunması ilə bağlı təkliflər səsləndirilib.

Allah bütün şəhidlərimizə rəhmət eləsin!