Şamaxı və İsmayıllı rayonlarında həssas kateqoriyalardan olan uşaq və gənclərin iştirakı ilə bölgədə ilk dəfə olaraq “İnklüziv yay düşərgəsi” fəaliyyətə başlayıb.

Düşərgə Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzinin İsmayıllı “DOST Evi” filialı, “Regional İnkişaf” İctimai Birliyi, “AzInTelecom” MMC və "Runaway House"ın birgə təşkilatçılığı ilə reallaşır.

İyulun 10-dək davam edəcək düşərgənin ilk günündə iştirakçılar DOST Evinin fəaliyyəti ilə yaxından tanış olub, müxtəlif yaradıcılıq emalatxanalarında master-klaslarda iştirak ediblər. Uşaqlar və gənclər üçün açıq havada musiqili proqram, habelə onların dünyagörüşünün zənginləşdirilməsi məqsədilə Basqal Dövlət Tarix-Mədəniyyət Qoruğu və muzeyinə ekskursiya təşkil edilib.

Düşərgə müddətində həssas qruplardan olan şəxslərin asudə vaxtının səmərəli təşkili və onların sosial inteqrasiyasının dəstəklənməsi məqsədilə müxtəlif proqramlar, o cümlədən interaktiv fəaliyyət və görüşlərin keçirilməsi nəzərdə tutulur.