Rusiyanın Sankt-Peterburq şəhərinin Əmək və Əhalinin Məşğulluğu Komitəsinin sədri Dmitri Çerneyko Əmək və Əhalinin Sosial Müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzində olub. Mərkəzin direktoru Nigar Məmmədova qonağı həssas əhali qruplarına aid şəxslərə göstərilən xidmət istiqamətləri ilə tanış edib. Qeyd olunub ki, Mərkəzə sosial baxımdan həssas 5 kateqoriya üzrə şəxslərin qəbulu aparılır. Birinci vitse-prezident Mehriban Əliyevanın təşəbbüsü ilə DOST konsepsiyası çərçivəsində yaradılan Mərkəz sosial islahatlar sahəsində unikal layihələrdən hesab olunur. İlk dəfə çoxşaxəli fəaliyyət istiqamətlərini bir arada cəmləşdirən inklüziv məkan Cənubi Qafqazda bu tipli ən böyük mərkəzdir. Burada həssas qruplardan olan şəxslərin yaradıcılıq potensialının inkişafı və cəmiyyətə tanıdılmasına müvafiq şərait yaradılıb, zərurət olduğu halda benefisiarlar sosial-psixoloji dəstəklə də təmin edilir. Mərkəzdə həmin şəxslərin sosial adaptasiyasını sürətləndirmək məqsədi ilə müxtəlif tədbirlər, aktivitələr həyata keçirilir. Qonağa Mərkəzin bölgədə özünüməşğulluq layihələrinin icrasına dəstək olacaq “DOST EVİ” Sərgi və Satış Mərkəzinin fəaliyyəti barədə də məlumat verilib.  
Rusiyanın Sankt-Peterburq şəhərinin Əmək və Əhalinin Məşğulluğu Komitəsinin sədri Dmitri Çerneyko Mərkəzdə benefisiarların və təlimçilərin hazırladıqları əl işlərinə baxıb, təlim prosesini və musiqiçilərin məşqini izləyib. Mərkəzdəki inklüziv yaradıcılıq mühiti qonaqda xüsusi təəssürat yaradıb.