Qazaxıstanın Xidmət və Turizm Kollecinin direktoru Səltənət Basıqarayeva və Qazaxıstanın ölkəmizdəki səfirinin xanımı Assemgül Bayel Əmək və Əhalinin Sosial Müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzinə səfər edib. Mərkəzin direktoru vəzifəsini icra edən Elnarə Ənsari qonaqlara qurumun fəaliyyəti, xidmət istiqamətləri və sosial psixoloji dəstək tədbirləri barədə məlumat verib. Qonaqlar həssas əhali qruplarına aid şəxslərin yaradıcılıq potensialının genişləndirilməsi üçün yaradılan şəraitlə tanış olub, təlim prosesini izləyiblər. Qeyd olunub ki, Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Leyla Əliyevanın iştirakı ilə 22 oktyabr 2021-ci il tarixində açılışı olan müəssisədə inklüziv cəmiyyətin inkişafına töhfə olaraq həssas kateqoriyalara aid şəxslərin sosial adaptasiyası sahəsində uğurlu işlər görülüb. İnklüzivlik anlayışının təşviqi məqsədi ilə bölgələrdə bu tipli müəssisələrin yaradılması istiqamətində ardıcıl tədbirlərin həyata keçirildiyi, Mərkəzin “DOST EVİ” filialının fəaliyyəti diqqətə çatdırılıb. Görüşdə DOST İnklüziv İnkişaf və Yaradıcılıq Mərkəzi ilə Qazaxıstanın Xidmət və Turizm Kolleci arasında əməkdaşlıq imkanlarına dair fikir mübadiləsi aparılıb. Qazaxıstanın Xidmət və Turizm Kollecinin direktoru Səltənət Basıqarayeva həssas qruplardan olan şəxslərin yaradıcılıq potensialının inkişafı sahəsində Mərkəzin fəaliyyətini yüksək qiymətləndirərək, rəhbərlik etdiyi təhsil müəssisəsində inklüzivliyin təmin edilməsi ilə bağlı atılan addımlardan danışıb. Mərkəzdə mövcud fəaliyyət istiqamətləri, o cümlədən floristika və landşaft dizaynı sahəsində yaradıcılıq mübadiləsi, həssas kateqoriyalarla iş istiqamətində birgə proqramlar, konfransların təşkili barədə təkliflər səsləndirilib. Qonaqlar ölkəmizin ev sahibliyi edəcəyi BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində Mərkəzdə hazırlanan əl işlərindən ibarət ekspozisiyaya da baxıblar. Mərkəzin istedadlı musiqiçilərinin ifasında təqdim edilən musiqi nömrələri qonaqlar tərəfindən maraqla qarşılanıb.