Əmək və Əhalinin Sosial Müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzinin Qarabağ “DOST Evi" şöbəsinə benefisiarların növbəti qəbulu keçirilib.

Onlardan 19 nəfər şöbədə müxtəlif fəaliyyət istiqamətləri üzrə təlimlərə yönəldilib.

Bölgənin zəngin musiqi ənənələri və mövcud tələbat nəzərə alınaraq Qarabağ “DOST Evi”ndə musiqi sahəsi üzrə yeni təlim istiqaməti açılıb. İlk dəfə olaraq piano ifaçılığı üzrə təlimlərə benefisiarların qəbulu aparılıb. Bununla da floristika, kulinariya, təsviri incəsənət, xalçaçılıq, toxuma və tikmə, bədii oyma, dərzilik və musiqi istiqamətləri daxil olmaqla, xidmət istiqamətlərinin sayı 7-yə çatdırılıb.

Bu təşəbbüs həm bölgədə yaşayan həssas kateqoriyalardan olan sakinlərin yaradıcı maraqlarını dəstəkləməyə, həm də yeni istedadların üzə çıxarılmasına xidmət edəcək.

Qeyd edək ki, hazırda Qarabağ “DOST Evi” şöbəsində 52 benefisiar müxtəlif fəaliyyət istiqaməti üzrə bacarıqlarını təkmilləşdirir.

Şöbəyə əlilliyi olan şəxslər, şəhid ailələrinin üzvləri, müharibə ilə əlaqədar əlilliyi müəyyən edilmiş şəxslər və onların övladları, valideynlərini itirmiş və ya valideyn himayəsindən məhrum uşaqlar, aztəminatlı ailələrin üzvləri müraciət edə bilərlər. Bunun üçün ilkin növbədə həmin ərazi üzrə DOST Mərkəzləri və SXA-nın yerli nümayəndəliklərində qeydiyyatdan keçmək zəruridir.      

Təlim müddətini uğurla başa vuran şəxslərə sertifikatlar verilir.