Ölkəmizdə səfərdə olan Pakistan İslam Respublikasının federal təhsil və peşə hazırlığı dövlət naziri xanım Vaciha Qəmərin rəhbərlik etdiyi nümayəndə heyəti Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzində olub.

       Mərkəzin direktoru Elnarə Ənsari qonaqlara müəssisənin fəaliyyət istiqamətləri və həssas əhali qruplarından olan şəxslərin sosiallaşması istiqamətində görülən işlər barədə məlumat verib.

      Qeyd olunub ki, Birinci vitse-prezident Mehriban Əliyevanın təşəbbüsü ilə yaradılan Mərkəz əlilliyi olan şəxslərin, şəhid ailəsi üzvlərinin, müharibə ilə əlaqədar əlilliyi olan şəxslər və onların övladlarının, eləcə də digər həssas kateqoriyalardan olan vətəndaşların yaradıcı bacarıqlarının aşkarlanması, inkişaf etdirilməsi, peşə vərdişlərinə yiyələnməsi və cəmiyyətə inteqrasiyası istiqamətində Cənubi Qafqazda xidmət göstərən ilk və ən böyük inklüziv məkandır. Burada benefisiarlara sosial-pedaqoji və psixoloji dəstək xidmətlərinin də göstərildiyi diqqətə çatdırılıb.

       Nümayəndə heyəti benefisiarların hazırladıqları əl işlərindən ibarət sərgiyə baxıb, Mərkəzdə fəaliyyət göstərən müxtəlif təlim studiyaları ilə tanış olub.

       Bildirilib ki, Mərkəzin istedadları respublika və beynəlxalq əhəmiyyətli tədbirlərdə ölkəmizi uğurla təmsil edirlər. Eyni zamanda, bölgələrdə inklüzivliyin təşviqi ilə əlaqədar Mərkəzin filiallarında həyata keçirilən layihələr barədə məlumat verilib.

       Mərkəzin təlimçilərinin ifasında musiqi nömrələri təqdim olunub. Mərkəzdə yaradılan mühit və həssas qruplardan olan şəxslərin sənət nümunələri qonaqların marağına səbəb olub.

       Xanım Vaciha Qəmər Mərkəzin xatirə kitabına ürək sözlərini qeyd edib.