Özbəkistanın Məşğulluq və Yoxsulluğun Azaldılması Nazirliyinin Beynəlxalq əməkdaşlıq şöbəsinin müdiri Əzizbek Rəhimovun müşayiət etdiyi nümayəndə heyəti DOST İnklüziv İnkişaf və Yaradıcılıq Mərkəzi ilə tanış olub. Qonaqlara Əmək və Əhalinin Sosial Müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzinin fəaliyyət istiqamətləri barədə məlumat verilib. Qeyd olunub ki, Birinci vitse-prezident Mehriban xanım Əliyevanın təşəbbüsü ilə yaradılan Mərkəzdə  həssas əhali qruplarına aid şəxslərin yaradıcılıq potensialının inkişaf etdirilməsi və cəmiyyətə tanıdılması istiqamətində iş aparılıb. İki illik fəaliyyəti müddətində Mərkəzdə əlilliyi olan şəxslər, şəhid ailəsi üzvləri, valideyn himayəsindən məhrum və ya valideynini itirmiş uşaqlar və digər həssas kateqoriyalara sosial-psixoloji dəstək göstərilib.  

Nümayəndə heyəti Mərkəzin benefisiarları və təlimçilərinin hazırladığı əl işləri ilə tanış olub, müxtəlif xidmət istiqamətləri üzrə yaradıcılıq studiyalarında təlim prosesini izləyib.