DOST İnklüziv İnkişaf və Yaradıcılıq Mərkəzinin Qarabağ “DOST Evi” şöbəsində 18 Sentyabr-Milli Musiqi Gününə həsr olunmuş tədbir keçirilib.

Bu münasibətlə Mədəniyyət Nazirliyinin tabeliyindəki Gəncə Dövlət Filarmoniyasının solistləri Qarabağ “DOST Evi” şöbəsinin qonaqları olublar. Musiqiçilər Mərkəzin təlimçi və benefisiarları ilə birgə konsert proqramı təqdim ediblər. İfaçılar Xalq Çalğı Alətləri Orkestri və Dövlət Kamera Orkestrinin müşayiətilə xalq və bəstəkar mahnıları səsləndiriblər. Tədbirdə şöbədə təlimlərə cəlb olunmuş benefisiarlar iştirak ediblər.

Mərkəzin İsmayıllıda yerləşən “DOST Evi” filialında isə Dağlıq Şirvan Regional Mədəniyyət İdarəsinin tabeliyində fəaliyyət göstərən musiqi məktəblərinin müəllimlərinin iştirakı ilə həssas qruplardan olan şəxslər üçün master-klas təşkil olunub. Benefisiarlara milli musiqi alətləri ilə tanışlıq imkanı yaradılıb, onların ifaçılıq bacarıqları yoxlanılıb, eyni zamanda musiqi nömrələri təqdim edilib.

Məqsəd benefisiarların musiqiyə olan maraqlarının artırılması, onların estetik zövq və dünyagörüşlərinin inkişaf etdirilməsi, həmçinin sosial inteqrasiyalarının dəstəklənməsidir.