Mediasiya Şurasının üzvləri Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzinin İsmayıllıda açılan “DOST EVİ” filialı ilə tanış olublar. Şuranın hesabat yığıncağı və Korporativ tədbiri çərçivəsində təşkil olunan tanışlıq səfəri zamanı mediatorlara “DOST Evi”nin fəaliyyəti barədə məlumat verilib. Qonaqlar 10 yaradıcılıq istiqaməti üzrə 6 emalatxanada həssas kateqoriyalara aid şəxslər üçün yaradılmış şəraitlə yaxından tanış olub. Bildirilib ki, “DOST EVİ” bölgədə müvafiq peşə hazırlığı kursları üçün təlim bazası funksiyasını yerinə yetirəcək, eyni zamanda özünüməşğulluq layihələrinin icrasına da dəstək olacaq. Bu Mərkəzin fəaliyyəti sosial cəhətdən həssas əhali qruplarından olan şəxslərin yaradıcılıq potensialının inkişafına, rifahının yaxşılaşdırılmasına təkan verəcək, bölgədə milli sənətkarlığın təbliği istiqamətində mühüm rol oynayacaq. Mediatorlar Sərgi və Satış Mərkəzində olub, DOST İnklüziv İnkişaf və Yaradıcılıq Mərkəzinin benefisiarlarının və təlimçilərinin əl işlərindən ibarət sərgiyə baxıblar.