DOST İnklüziv İnkişaf və Yaradıcılıq Mərkəzinin benefisiarları üçün kuklaçılıq üzrə master-klass təşkil olunub. Azərbaycan Rəssamlar İttifaqının üzvü, kuklaçı- rəssam Fərəh Əliyeva Mərkəzin qonağı olub. Kuklaçı-rəssam qədim köklərə malik bu sənətin tarixi ilə bağlı maraqlı məlumatları benefisiarlarla bölüşüb. Qonaq unikal mədəni irs nümunəsi olan kuklaların hazırlanması prosesindən bəzi məqamları əyani olaraq benefisiarlar ilə birlikdə sınaqdan keçirib. Kukla personajları üzərində işləmək mərhələlərini öyrədib, iştirakçıların suallarını cavablandırıb. Kuklaçı rəssam özünün kolleksiyasından bir neçə nümunəni benefisiarlar üçün nümayiş etdirib. Qeyd edək ki, layihənin təşkilində məqsəd Mərkəzdəki yaradıcı mühitin müxtəlifliyini nəzərə alaraq, benefisiarlarda kuklaçılıq sənəti barədə təsəvvür yaratmaqdır. Məlumat üçün bildirək ki, Moskva Beynəlxalq Kukla Sərgisi(2011), Bakı Beynəlxalq Biennalisi(2011, 2013) və bir çox tematik sərgilərin iştirakçısı olan Fərəh Əliyeva 100-ə qədər qarışıq texnikalı əsərlərin müəllifidir. Əl işləri Azərbaycanla yanaşı, müxtəlif ölkələrdə muzey, qalereya və şəxsi kolleksiyalarda saxlanılır.