Koreyanın Əlilliyi olan Şəxslər üzrə Məşğulluq Agentliyinin (KƏŞMA) nümayəndə heyəti Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzində olub.

Mərkəzin direktoru Elnarə Ənsari nümayəndə heyətini qurumun fəaliyyəti ilə tanış edib. Həssas qruplardan olan şəxslərin bacarıqlarının inkişaf etdirilməsi istiqamətində həyata keçirilən layihə və təşəbbüslər barədə ətraflı məlumat verib.

KƏŞMA-nın Peşə bacarıqları inkişafı bürosunun direktoru Ms.Han-younkyoungun rəhbərlik etdiyi nümayəndə heyətinin üzvləri təlim studiyaları ilə tanış olub, yaradıcılıq nümunələrinin hazırlanması prosesini izləyiblər.

Təlimçi və benefisiarların müxtəlif mövzularda hazırladıqları əl işlərindən ibarət sərgi qonaqların marağına səbəb olub.

Daha sonra Mərkəz üzvlərinin ifasında Azərbaycan və dünya musiqisindən ibarət bədii proqram təqdim edilib.

Sonda Ms.Han-younkyoung Mərkəzlə bağlı təəssüratlarını xatirə kitabında qeyd edib.