​DOST İnklüziv İnkişaf və Yaradıcılıq Mərkəzinin İsmayıllı “DOST Evi” filialında həssas əhali qrupundan olan uşaqlar üçün sağlam həyat tərzinin təşviqinə yönəlmiş maarifləndirici tədbir təşkil olunub.

​       ​Səhiyyə Nazirliyinin İctimai Səhiyyə və İslahatlar Mərkəzinin (İSİM) “Sağlam düşüncə” layihəsi çərçivəsində reallaşdırılan tədbirin məqsədi uşaqlar arasında sağlam həyat tərzinin təbliği, düzgün qidalanma, şəxsi gigiyena və gündəlik rejimin sağlamlığın qorunmasındakı rolu barədə məlumatlılığın artırılması, eləcə də onlarda faydalı vərdişlərin formalaşdırılması olub.

​       ​Tədbir çərçivəsində İSİM əməkdaşları əvvəlcə Filialın Sərgi və Satış Mərkəzində nümayiş etdirilən əl işlərinə baxıb və fəaliyyətlə tanış olublar. Qonaqlara bölgədə inklüzivliyin təbliği, müxtəlif həssas kateqriyalara aid şəxslərin cəmiyyətə inteqrasiyası və məşğulluğunun dəstəklənməsi istiqamətində görülən işlər barədə ətraflı məlumat verilib.

       ​​Daha sonra İSİM-in mütəxəssisləri tərəfindən həssas əhali qruplarından olan şəxslərə  “Sağlam həyat tərzi” mövzusunda təqdimat edilib. Təqdimat zamanı şəxsi gigiyena, düzgün və balanslı qidalanmanın uşaqların inkişafında vacib rol oynadığı diqqətə çatdırılıb.

​       ​Sonda benefisiarlar arasında “Sağlam və zərərli qidalar” mövzusunda viktorina keçirilib.