Əmək və Əhalinin Sosial Müdafiəsi Nazirliyinin tabeliyində fəaliyyət göstərən DOST İnklüziv İnkişaf və Yaradıcılıq Mərkəzində “İnklüziv DOST” könüllüləri üçün növbəti maarifləndirici təlim təşkil olunub.

Təlim Mərkəzin Sosial-pedaqoji inkişaf və psixoloji dəstək departamentinin əməkdaşı Cəmalə Hüseynova tərəfindən keçirilib. “İnklüziya gənclərin baxışı ilə” və “Jest dili” mövzularına həsr olunan təlimdə həssas əhali qrupları anlayışı, ölkəmizdə və dünyada əlilliyi olan şəxslər üçün yaradılan imkanlar, eləcə də əlilliyə yanaşmada tibbi və sosial modellər barədə ətraflı məlumat verilib.

Eyni zamanda iştirakçılara jest dilinin tarixi, beynəlxalq jest anlayışı, jest dilinin əsas kateqoriyaları haqqında məlumatlar çatdırılıb, mövzu ətrafında müzakirələr aparılıb.

Qeyd edək ki, “İnklüziv DOST” könüllüləri üçün bu tip təlimlərin davamlı şəkildə keçirilməsi nəzərdə tutulur.