DOST İnklüziv İnkişaf və Yaradıcılıq Mərkəzinin yaranmasından 3 il ötür. 22 oktyabr 2021-ci il tarixində Prezident İlham Əliyev, birinci xanım Mehriban Əliyeva və qızları Leyla Əliyevanın iştirakı ilə  açılışı olan DOST İnklüziv İnkişaf və Yaradıcılıq Mərkəzi Cənubi Qafqazda bu tipli ilk ən böyük müəssisə hesab olunur.

Birinci vitse-prezident Mehriban Əliyevanın təşəbbüsü ilə yaradılan Mərkəzdə bu müddət ərzində 5 həssas kateqoriyadan olan 580-ə yaxın şəxsə xidmət göstərilib. Hazırda həssas əhali qruplarından olan 160-a yaxın benefisiar təlimlərdən yararlanır.

 Mərkəz inklüziv cəmiyyətin inkişafı, sosial bərabərliyin dəstəklənməsi məqsədi ilə yaradılmış unikal təşəbbüsdür və bu vaxtadək həssas əhali qruplarından olan şəxslərin cəmiyyətə inteqrasiyası üçün 100-dən çox tədbir təşkil olunub.

Mərkəzin benefisiarlarının əl işləri ölkəmizin hüdudlarından kənarda 2 beynəlxalq tədbirdə - 4-cü Qış Olimpiya Oyunları çərçivəsində Cənubi Koreyanın Qanqvon əyalətində əlilliyi olan gənclərin əl işlərindən ibarət sərgidə, həmçinin Cenevrədə Millətlər Sarayında 2 aprel-Dünya Autizm Məlumatlandırma Gününə həsr olunmuş ekspozisiyada nümayiş etdirilib.

Mərkəzin özəlliyi ondadır ki, burada müxtəlif yaradıcılıq istiqamətləri üzrə təlimlərlə bərabər, sosial pedaqoji və psixoloji dəstək xidmətləri də göstərilir. Cari il ərzində DOST İnklüziv İnkişaf və Yaradıcılıq Mərkəzində həssas əhali qruplarından olan şəxslərə 1400-dən çox sosial pedaqoji inkişaf və psixoloji dəstək xidmətləri göstərilib. Bunun 740-dan çoxu psixoloji, 250-dən çoxu psixopedaqoji, 400-dən çoxu isə defektoloji-loqopedik və surdotərcümə xidmətlərini əhatə edib.

Qeyd edək ki, noyabr ayında Mərkəzin İsmayıllıda yerləşən “DOST EVİ” filialının fəaliyyətinin bir ili tamam olacaq. Həmçinin Mərkəzin Qarabağ DOST EVİ şöbəsində də təlimlərə başlanılması nəzərdə tutulur. Bundan əlavə, Mərkəzdəki təlim istiqamətlərinin sayını artırmaq, müasir tələblərə cavab verən peşə sahələrinə benefisiarların marağını gücləndirmək əsas hədəflərdəndir. Sosial cəhətdən həssas əhali qruplarından olan şəxslərin cəmiyyətə adaptasiyası istiqamətində işlər davam etdiriləcək.