DOST İnklüziv İnkişaf və Yaradıcılıq Mərkəzinin “DOST EVİ” filialının benefisiarları Şahdağ Milli Parkının İsmayıllı bölməsinə ekskursiya ediblər. “Yaşıl dünya naminə həmrəylik ili” çərçivəsində təşkil olunan məlumatlandırma turunda Şahdağ Milli Parkının özünəməxsus xüsusiyyətlərindən bəhs olunub. Parkın landşaft xüsusiyyətləri, biomüxtəlifliyin qorunması və ekoturizmin inkişafındakı vacib roluna diqqət çəkilib. Benefisiarlar ərazidə saxlanılan, nəsli kəsilməkdə olan nadir heyvan növlərini izləyiblər. Ekskursiyada həssas qruplardan olan şəxslərlə birgə Ekologiya və Təbii Sərvətlər Nazirliyinin könüllüləri də iştirak edib. Məqsəd həssas qruplardan olan şəxslərin 5 iyun Ümumdünya ətraf mühitin mühafizəsi günü ilə əlaqədar ekoloji maarifləndirmə prosesinə cəlb olunması, Azərbaycan təbiətinin zəngin fauna və flora aləmi barədə təsəvvür yaratmaqdır.