Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən aksiya çərçivəsində TƏBİB tərəfindən hərəkət məhdudiyyəti olan qız uşaqlarının evdə tibbi müayinələrinin aparılması prosesi davam edir.

Ölkə üçün prioritet sahələrdən biri olan ana, qadın və uşaq sağlamlığının yaxşılaşdırılmasına yönələn bu humanist aksiyada Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzinin İsmayıllı DOST Evi filialının əməkdaşları da iştirak ediblər.

İsmayıllı rayonunda təşkil edilən səyyar xidmət çərçivəsində ailələrə filialın fəaliyyət istiqamətləri, təqdim olunan xidmətlər, həmçinin sosial-pedaqoji və psixoloji dəstək imkanları barədə ətraflı məlumat verilib.

Eyni zamanda, sağlamlıq imkanları məhdud uşaqlar üçün xüsusi master-klaslar təşkil edilib, onların yaradıcılıq potensialı dəyərləndirilərək filiala qəbul qaydaları barədə zəruri təlimatlar diqqətə çatdırılıb.

Qeyd edək ki, aksiya çərçivəsində respublikanın 65 şəhər və rayonu üzrə dispanser qeydiyyatında olan 4161 hərəkət məhdudiyyətli qız uşağının evdə tibbi müayinəsi həyata keçirilir. TƏBİB və Nazirliyin tabeliyindəki Sosial Xidmətlər Agentliyinin birgə əməkdaşlığı ilə təşkil olunan bu multidisiplinar müayinələr uşaqların həm tibbi, həm də sosial ehtiyaclarının eyni vaxtda qiymətləndirilməsinə imkan verir.