Birləşmiş Millətlər Təşkilatının Azərbaycandakı nümayəndəliyinin Əmək və Əhalinin Sosial Müdafiəsi Nazirliyi ilə birgə əməkdaşlığı çərçivəsində Bakı bulvarında keçiriləcək “Güvən Yürüşü”nə hazırlıqla əlaqədar onlayn təlim keçirilib. DOST İnklüziv İnkişaf və Yaradıcılıq Mərkəzinin Sosial pedaqoji inkişaf və psixoloji dəstək departamentinin mütəxəssisləri tərəfindən təşkil edilən maarifləndirici təlimdə Azərbaycan Gənclər Fondunun 50 nəfərədək könüllüsü iştirak edib. Təlimdə DOST İnklüziv İnkişaf və Yaradıcılıq Mərkəzinin fəaliyyəti haqqında məlumat verilib. İştirakçılara həssas əhali qrupundan olan şəxslərlə psixo-sosial iş, onların cəmiyyətdə qarşılaşdıqları problemlər və stiqmatizasiya, bu kateqoriyadan olan şəxslərlə etik davranış qaydaları, tez-tez istifadə olunan sözlərin jest dilində ifadəsi, ilkin psixoloji yardımın göstərilməsi qaydaları haqqında məlumatlar verilib.

Qeyd edək ki, oktyabrın 28-də  Birləşmiş Millətlər Təşkilatının Azərbaycandakı nümayəndəliyinin Əmək və Əhalinin Sosial Müdafiəsi Nazirliyi ilə birgə əməkdaşlığı çərçivəsində Bakı bulvarında “Güvən Yürüşü” təşkil ediləcək. Yürüşdə DOST İnklüziv İnkişaf və Yaradıcılıq Mərkəzi və Sosial Xidmətlər Agentliyindən olan  50 nəfərədək əlilliyi olan şəxs iştirak edəcək.