Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzində “Konstitusiya və Suverenlik İli” çərçivəsində “Gənclər və vətəndaş məsuliyyəti” mövzusunda “Söz səndə” adlı tədbir keçirilib.

Tədbirdə “Könüllü DOST” proqramının “İnklüziv DOST” və “Gənc DOST” altproqramları üzrə fəaliyyətə cəlb olunmuş gənclərlə yanaşı, “Femida Könüllüləri” Təşkilatının üzvləri də iştirak ediblər.

Tədbir Dövlət himninin səsləndirilməsi ilə başlayıb. Ümummilli Lider Heydər Əliyevin, Azərbaycanın müstəqilliyi, ərazi bütövlüyü və suverenliyi uğrunda şəhid olan Vətən övladlarının xatirəsi bir dəqiqəlik sükutla yad edilib.

Sonra “İnklüziv DOST” könüllülərinin vətəndaş cəmiyyəti quruculuğunda gənclərin təşəbbüskar mövqeyi, informasiya mühitindəki roluna diqqət çəkən çıxışları dinlənilib.

Azərbaycan Respublikası Konstitusiyasının qəbulunda Ulu öndər Heydər Əliyevin rolu və bu mühüm hüquqi sənədin inkişaf mərhələlərindən bəhs edilib.

Layihənin panel müzakirələrində Daxili İşlər Nazirliyinin Baş İctimai Təhlükəsizlik İdarəsinin Yetkinlik yaşına çatmayanlarla profilaktiki işin təşkili şöbəsinin rəis müavini, polis polkovnik-leytenantı İmran Əliyev, Ailə, Qadın və Uşaq Problemləri üzrə Dövlət Komitəsinin baş məsləhətçisi Rafiq Mahmudov, idarəetmə üzrə ekspert Fərhad Pərvizi, Mərkəzin İnsan resursları, daxili nəzarət, sənədlərlə və vətəndaşlarla iş departamentinin müdiri Miraqil Seyidzadə iştirak ediblər.

Tədbir iştirakçıları Azərbaycanda fəal, vətənpərvər ruhlu gənc nəslin formalaşmasını dövlət gənclər siyasətinin uğurlu nəticəsi kimi səciyyələndiriblər. Cəmiyyətdə mövcud neqativ halların təsirindən onları qorumağın vacibliyi, sosial bərabərliyin təmin olunması və ailə dəyərlərinin təbliği ilə bağlı məsələlər ətrafında fikir mübadiləsi aparılıb.

Könüllülərin sualları cavablandırıldıqdan sonra, Mərkəzdə könüllülük fəaliyyətini başa vuran 50 nəfərdən çox gəncə sertifikatlar təqdim edilib.