5 İyul - Dünya Badminton Günü ilə əlaqədar Azərbaycan Badminton Federasiyası və DOST İnklüziv İnkişaf və Yaradıcılıq Mərkəzinin birgə təşəbbüsü ilə tədbir təşkil olunub. Layihədə Mərkəzin həssas əhali qruplarından olan 20-dən artıq benefisiarı, o cümlədən valideyn himayəsindən məhrum olmuş uşaqlar. əlilliyi olan şəxslər iştirak edib.  Mərkəzin rəqs studiyasında benefisiarların iştirakı ilə badminton oyunu keçirilib. Tədbir çərçivəsində “Bakılı oğlanlar” Şən və Hazırcavablar Klubunun üzvü, rejissor və aktyor, publisist, əməkdar artist Bəhram Bağırzadə uşaqlar üçün yazdığı “Badminton” kitabını imzalayaraq, benefisiarlara hədiyyə edib.  Badminton Federasiyasının dəstəyi ilə nəşr olunmuş  kitabda badmintonun tarixi,  Azərbaycanda bu idman növünün yayılması və idmançılarımızın uğurlarına dair maraqlı məlumatlar toplanıb. Məlumatlar Azərbaycan və ingilis dillərində oxuculara təqdim olunub. Kitabların təqdimatından sonra müəllif benefisiarlarla yarışa qatılaraq, onlarla badminton oynayıb. 

Məlumat üçün bildirək ki, DOST İnklüziv İnkişaf və Yaradıcılıq Mərkəzi Badminton Federasiyası ilə 2022-ci ildən müntəzəm əməkdaşlıq edir. Əməkdaşlıq nəticəsində Mərkəzin üzvləri müasir texnologiyalarla badmintonu yeni idman növü kimi sınaqdan keçirmək imkanı qazanıb.