Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzinin musiqiçiləri “İçərişəhər” Dövlət Tarix-Memarlıq Qoruğu İdarəsi ərazisində Uşaqların Beynəlxalq Müdafiəsi Günü ilə əlaqədar keçirilən tədbirdə çıxış ediblər. “Nağıllar aləmi İçərişəhər” adlı tədbir paytaxt sakinləri və qonaqlarına bayram ovqatı bəxş edib. Tədbir çərçivəsində Mərkəzin təlimçi və benefisiarları tamaşaçıların qarşısına maraqlı repertuarla çıxıb. Konsert proqramında Azərbaycan bəstəkarlarının əsərləri, xalq mahnıları və sevilən dünya hitləri ifa olunub.

Qeyd edək ki, 2021-ci ildən fəaliyyət göstərən DOST İnklüziv İnkişaf və Yaradıcılıq Mərkəzi Cənubi Qafqazda kifayət qədər çoxşaxəli fəaliyyətə malik ilk ən böyük inklüziv məkandır. Bu vaxtadək Mərkəz və filiallarında 720 nəfərdən çox şəxs müxtəlif fəaliyyət istiqamətləri üzrə təlimlərə və sosial-psixoloji dəstək xidmətlərinə cəlb olunub ki, onlardan 362 nəfərini uşaqlar təşkil edib. Mərkəz üzvləri bundan əvvəl iki dəfə İçərişəhərdə keçirilən Novruz bayramı günlərində musiqi sovqatı ilə tamaşaçıların görüşünə gəlib.