Cenevrədəki  Millətlər Sarayında Gürcüstan Respublikasının BMT-dəki Daimi Nümayəndəliyi, Azərbaycan Respublikasının Cenevrədəki BMT Bölməsi və digər beynəlxalq təşkilatlar yanında Daimi Nümayəndəliyinin təşkilatçılığı ilə "Hüquqlarla Yaşamaq: Autizm, Qayğı və Dəstək, və İnklüzivlik" mövzusunda hibrid formatda tədbir keçirilib.

Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzinin direktoru Elnarə Ənsari tədbirin onlayn panel müzakirələrində iştirak edib.

BMT-nin İnsan Hüquqları Şurasının 60-cı sessiyası çərçivəsində təşkil olunan tədbirdə Elnarə Ənsari Mərkəzin fəaliyyəti və autizm spektr pozuntusu olan şəxslərin bacarıqlarının inkişaf etdirilməsi, sosial adaptasiyası istiqamətində görülən işlərdən danışıb. Autizmli fərdlərin sosiallaşması və yaradıcılıq potensialının artırılması sahəsindəki təcrübəsini bölüşüb.

Gürcüstan Hökumət Administrasiyası, Ümumdünya Səhiyyə Təşkilatı və BMT-nin Uşaq Hüquqları üzrə Komitəsinin üzvlərinin iştirak etdiyi tədbirdə autizm spektr pozuntusu olan şəxslərin cəmiyyətdə üzləşdiyi maneələr, həlli yolları, bu sahədə ölkələr arasında təcrübə mübadiləsinin gücləndirilməsi məsələləri müzakirə olunub.