Azərbaycan Dövlət İqtisad Universitetinin (UNEC) İnklüziv Təhsil Mərkəzi ilə əməkdaşlıq çərçivəsində təlimləri uğurla bitirən DOST İnklüziv İnkişaf və Yaradıcılıq Mərkəzinin bir qrup benefisiarına sertifikatlar təqdim edilib.

DOST İnklüziv İnkişaf və Yaradıcılıq Mərkəzinin direktoru Elnarə Ənsari həssas qruplardan olan şəxslərin peşə bacarıqlarının formalaşması və sosial adaptasiyasında birgə fəaliyyətin müsbət nəticələrindən bəhs edib.

Qeyd olunub ki, Mərkəz tərəfindən həssas kateqoriyalardan olan istedadlı şəxslərə yaradıcılıq potensialının inkişafı ilə yanaşı, müasir dövrün tələblərinə uyğun bacarıqlara yiyələnməsi istiqamətində də dəstək göstərilir.

UNEC İnklüziv Təhsil Mərkəzinin direktoru Sevinc Məhsimova layihənin həssas qrupların cəmiyyətə inteqrasiyasında mühüm rol oynadığını diqqətə çatdıraraq,  bu sahədə qarşılıqlı təcrübə mübadiləsinin davamlı olmasının vacibliyini bildirib.

Tədbir çərçivəsində bank işi, menecment, informasiya texnologiyaları üzrə təlimləri bitirən bir qrup benefisiara, həmçinin Mərkəzdə təlim müddətini başa vuran 10 nəfərə sertifikatlar verilib.

İnklüziv cəmiyyətin inkişafına və əməkdaşlığa verdiyi töhfəyə görə Azərbaycan Dövlət İqtisad Universitetinin (UNEC) təlim prosesində fəal iştirak edən müəllimləri Aynur Zeynalova, Flora Kaşıyeva, Məlahət Rüstəmova və Musa Musayevə təşəkkürnamələr verilib.

Sonda Mərkəzin istedadlı üzvlərinin ifasında musiqi nömrəsi təqdim edilib.