DOST İnklüziv İnkişaf və Yaradıcılıq Mərkəzinin ötən dövrdə 12 məzunu Mərkəz və onun filiallarında təlimçi olaraq əmək fəaliyyətinə cəlb olunub. Onlar peşə vərdişlərini həssas qruplardan olan digər şəxslərə aşılayırlar. 
 

Birinci vitse-prezident Mehriban Əliyevanın təşəbbüsü ilə yaradılmış  Mərkəz həssas qruplara aid şəxslərin (əlilliyi olan şəxslər, şəhid ailələrinin üzvləri, valideynlərini itirmiş və valideyn himayəsindən məhrum olmuş uşaqlar, aztəminatlı ailələr və b.) yaradıcılıq potensialının inkişafına dəstək göstərir. 
 

Mərkəzin qeyd olunan 12 məzunundan Prezident mükafatçısı Fatimə İsrafilova, Yaşar Məmmədzadə, Fərid Abdullayev, Xətai Azayev, Nurlan Əhmədov, Xaliq Şərifov Mərkəzdə fəaliyyətə benefisiar olaraq başlasalar da, hazırda əməkdaş kimi fəaliyyət göstərirlər. 
 

Aybəniz İsaqova, Gülnarə Abbasova, Gülşən Abbasova, Rüfət Hüseynov Qarabağ Regional DOST Mərkəzindəki Qarabağ “DOST Evi”ndə, Fuad Musayev, Vüsal Əliyev isə İsmayıllıdakı “DOST Evi” filialında təlimçi kimi çalışırlar. 
 

Bu günədək DOST İnklüziv İnkişaf və Yaradıcılıq Mərkəzi və onun filiallarında həssas qruplardan olan 700-dən çox şəxs xidmətlərdən yararlanıb.