Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzində həssas qruplardan olan şəxslər üçün "Xoş gəldin, Bahar!" adlı tamaşanın təqdimatı olub. Tamaşa Azərbaycan İncəsənət Məktəbinin aktyorlarının ifasında “Kino həftəsi” layihəsi çərçivəsində nümayiş olunub. Səhnə əsərinin təqdimatında Mərkəzdə təlim prosesini başa vurmuş uşaq və yeniyetmələr də daxil olmaqla, ümumilikdə 60 nəfərə yaxın benefisiar, valideynləri və qəyyumları iştirak ediblər. Səhnə əsərinin müəllifi və rejissoru Abdulla Şaiq adına Azərbaycan Dövlət Kukla teatrının aktyoru Rəhim Rəhimovdur. Tamaşa uşaqlar üçün maraqlı kukla teatrı elementləri və rəqslərlə zənginləşdirilib. Səhnə əsəri Novruz bayramının adət-ənənələrini, o cümlədən qədim “Kilimarası” xalq oyunu barədə məlumatları izləyicilərə aşılayır. Əsərin nümayişindən sonra yaradıcı heyətə təşəkkürnamə və sertifikatlar təqdim olunub.