DOST İnklüziv İnkişaf və Yaradıcılıq Mərkəzində həssas əhali qruplarından olan şəxslərin bilik və bacarıqlarının inkişafına yönəlmiş “DOSTlarla öyrən” adlı yeni maarifləndirici layihəyə start verilib. Layihənin məqsədi ingilis dili üzrə praktiki bacarıqları gücləndirməklə yanaşı, iştirakçıların fərdi inkişafını təşviq etmək, onların özünəinamını artırmaq və mövcud potensiallarını üzə çıxarmaqdır.

İlk təlim “Uşaq Hüquqları Günü”nə həsr olunub. Təlim zamanı benefisiarlara öz fikirlərini sərbəst ifadə etmək, müxtəlif mövzularda interaktiv şəkildə müzakirələr aparmaq üçün imkan yaradılıb. Mərkəzdə fəaliyyət göstərən “İnklüziv DOST” könüllüləri tərəfindən təşkil edilən məşğələlər rol oyunları, əyləncəli sual-cavab sessiyaları və qarşılıqlı öyrənmə metodları yadda qalıb.

Layihə çərçivəsində həftədə bir dəfə təlimlərin keçirilməsi nəzərdə tutulur. Eyni zamanda benefisiarların yaş, ehtiyac və hazırkı bilik səviyyələrinə uyğunlaşdırılmış xüsusi dərs proqramının hazırlanması planlaşdırılır.