10 Oktyabr - Psixi Sağlamlıq Günü ilə əlaqədar olaraq Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzində “Psixi sağlamlığa yaradıcı toxunuş” mövzusunda tədbir keçirilib.

Əvvəlcə Mərkəzin fəaliyyətini və əsas xidmət istiqamətlərini əks etdirən videoçarx nümayiş etdirilib.

Tədbiri giriş sözü ilə açan Mərkəzin direktor müavini Mətanət Məmmədova psixi sağlamlığın bütövlükdə cəmiyyətin rifahında və sosial harmoniyanın qorunmasında həlledici rol oynadığını vurğulayıb. Qeyd olunub ki, DOST İnklüziv İnkişaf və Yaradıcılıq Mərkəzində həssas əhali qruplarına aid şəxslərin peşə və yaradıcılıq bacarıqlarının inkişaf etdirilməsi ilə yanaşı, onlara sistemli şəkildə sosial-psixoloji dəstək xidmətləri göstərilir. Mərkəz tərəfindən həyata keçirilən bu dəstək tədbirlərinin müsbət nəticələri və əldə olunan uğurlar tədbir iştirakçılarının diqqətinə çatdırılıb.

Daha sonra psixi sağlamlıq sahəsində tanınmış mütəxəssislərin iştirakı ilə təqdimat və panel müzakirələr keçirilib. “Nəfəs” Klinikasının həkim-psixiatrı Vəfa Şirinova, “Ege” Hospitalın şöbə müdiri, həkim-psixiatr Orxan İsgəndərov, psixoloq, psixoterapevt Nərmin Osmanlı və Psixi Sağlamlıq Mərkəzinin psixoloqu, psixoterapevt Gülsabah Quliyeva cəmiyyətdə mövcud vəziyyət, psixi sağlamlıq və emosional rifahı səciyyələndirən mühüm mövzular ətrafında çıxış ediblər.

Çıxışlarda autizm spektr pozuntusu olan uşaqlarla bağlı tədqiqat nəticələri; fiziki məhdudiyyətli şəxslərin inteqrasiyasına maneələrin aradan qaldırılması; psixoloji dayanıqlığın artırılması və digər məsələlərə diqqət yetirilib.

Layihəyə Bakı Dövlət Universiteti, Bakı Biznes Universiteti, Bakı Slavyan Universiteti, Azərbaycan Dövlət Pedaqoji Universiteti və Azərbaycan Universitetinin müəllim, tələbə heyəti cəlb olunub. Tədbirdə Ailə, Qadın və Uşaq Problemləri üzrə Dövlət Komitəsi, Sosial Xidmətlər Agentliyinin nümayəndələri də iştirak ediblər.

Panel müzakirələr iştirakçıların suallarının cavablandırılması ilə yekunlaşıb.

Tədbirin bədii hissəsində Mərkəz üzvlərinin ifasında musiqi və rəqs nömrələri təqdim edilib.