Əmək və Əhalinin Sosial Müdafiəsi Nazirliyinin tabeliyində fəaliyyət göstərən DOST İnklüziv İnkişaf və Yaradıcılıq Mərkəzində “Səsimiz bir” adlı layihə təqdim olunub.

Layihə çərçivəsində Mərkəzin üzvləri Rauf Hacıyev adına 15 nömrəli Onbirillik Musiqi Məktəbinin istedadlı şagirdləri ilə eyni səhnəni paylaşıblar.

Layihəyə həssas əhali qruplarından olan şəxslər, onların valideynləri və qəyyumları cəlb edilib. Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin dəstəyi ilə tədbirdə himayədar ailə institutunun təşviqi məqsədilə himayədar valideynlər və onların himayəsində olan valideyn himayəsindən məhrum uşaqların iştirakı da təmin olunub.

İncəsənətin sosial adaptasiya və cəmiyyətin birləşdirici vasitəsi kimi roluna diqqət çəkən layihə inklüzivlik anlayışının cəmiyyətdə daha geniş şəkildə təbliğinə xidmət edir.

DOST İnklüziv İnkişaf və Yaradıcılıq Mərkəzinin direktoru Elnarə Ənsari layihənin sosial bərabərliyin təmin olunmasına və uşaqların yaradıcılıq vasitəsilə sosiallaşmasına mühüm töhfə verdiyini bildirib.

Rauf Hacıyev adına 15 nömrəli Onbirillik Musiqi Məktəbinin direktoru Sevil Ələkbərova isə şagirdlərin bu cür sosial və yaradıcı layihələrdə iştirakının onların inkişafı baxımından xüsusi əhəmiyyət daşıdığını vurğulayıb.

Konsert proqramında Azərbaycan və dünya bəstəkarlarının əsərləri, sevilən musiqi nömrələri səsləndirilib.

Tədbir çərçivəsində qonaqlar Mərkəzin təlim studiyaları, əl işləri və onların hazırlanma prosesi ilə tanış olublar.