Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzi və onun filiallarında hazırda ümumilikdə 318 nəfərə xidmət göstərilir. Onlardan 173 nəfəri Mərkəzdə, 47 nəfəri İsmayıllı DOST Evi filialında, 98 nəfəri isə Qarabağ DOST Evi şöbəsində xidmətlərdən yararlanır.

Yaş qruplarına əsasən benefisiarların 36 nəfəri 6–10 yaş, 153 nəfəri 11–18 yaş, 129 nəfəri isə 18 yaş və yuxarı yaş kateqoriyasına daxildir.

Birinci vitse-prezident Mehriban Əliyevanın təşəbbüsü ilə yaradılan Mərkəzdə şəhid ailələrinin üzvləri, müharibə ilə əlaqədar əlilliyi olan şəxslərin övladları, valideynini itirmiş və valideyn himayəsindən məhrum uşaqlar, əlilliyi olan şəxslər, aztəminatlı ailələrdən olan şəxslərə xidmət göstərilir.

Ötən dövr ərzində ümumilikdə 1000-dən çox həssas əhali qrupundan olan şəxs Mərkəzin xidmətlərindən faydalanıb.

Mərkəz, onun Bərdə və İsmayıllıdakı DOST Evi filallarında həssas qruplara aid şəxslərin təlimlər vasitəsilə yaradıcı potensialı, bacarıqları inkişaf etdirilir, həmçinin onların cəmiyyətə inteqrasiyasına dəstək göstərilir.