Əmək və Əhalinin Sosial müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzində 8 Mart-Beynəlxalq Qadınlar Günü münasibətilə tədbir keçirilib. Tədbirdə İnklüziv Kamera Orkestrinin musiqiçilərinin müşayətilə konsert proqramı təqdim edilib. Proqramda dünya kinosu, eləcə də Azərbaycan filmlərindən sevilən melodiyalar, retro mahnılar səsləndirilib. Ümumilikdə layihəyə Mərkəzdə təlim alan benefisiarlar, onların valideynləri və ya qəyyumları, təlimçilər, əməkdaşlar və “İnklüziv DOST” könüllüləri olmaqla, 100-dən artıq xanım iştirakçı cəlb olunub. 8 Mart-Beynəlxalq Qadınlar Gününə həsr olunmuş videoçarx tamaşaçılarda xoş ovqat yaradıb. Sonda tədbirin bütün xanım iştirakçılarına güllər hədiyyə edilib. Qeyd edək ki, hazırda DOST İnklüziv İnkişaf və Yaradıcılıq Mərkəzində sosial baxımdan 5 həssas kateqoriyadan olan 180-dən çox şəxs müxtəlif fəaliyyət və subfəaliyyət istiqamətləri üzrə təlimlərdə iştirak edir.