Tədbir çərçivəsində keçirilən müsabiqədə Mərkəzin benefisiarı Daniil Xəlilovun əl işi 3-cü yerə layiq görülüb.
 

BMT-nin Ətraf Mühit Proqramı (UNEP) ilə tərəfdaşlıq çərçivəsində Heydər Əliyev Mərkəzində Ümumdünya Ətraf Mühit Günü ilə əlaqədar keçirilən beynəlxalq tədbirdə Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzi də təmsil olunub.

“Təbiətdən ilham alaraq. İqlim naminə. Gələcəyimiz naminə” mövzusuna həsr olunmuş tədbir çərçivəsində Mərkəzin benefisiarları tərəfindən rəqs kompozisiyaları təqdim olunub. Sərgi zonasında isə Mərkəzin təsviri incəsənət istiqaməti üzrə benefisiarlarının ətraf mühit və təbiət mövzusunda hazırladıqları rəsm əsərləri, həmçinin müxtəlif yaradıcılıq istiqamətlərini əks etdirən əl işləri nümayiş etdirilib.

Bununla yanaşı, qonaqlar üçün floristika və vitraj sənəti üzrə master-klaslar təşkil olunub. Sərgi iştirakçılarına yaradıcılıq prosesində yaxından iştirak etmək və bu sənət növləri ilə tanış olmaq imkanı yaradılıb.

Sərgidə “Təmiz Şəhər” ASC-nin sosial-ekoloji yönümlü “Card to Art” layihəsi çərçivəsində Mərkəzdə ərsəyə gətirilən maraqlı əsərlər də nümayiş olunub. İstifadə müddəti bitmiş plastik kartlardan hazırlanan, təkrar emal və ekoloji məsuliyyət ideyalarını incəsənətlə birləşdirən bu nümunələr ziyarətçilər tərəfindən böyük maraqla qarşılanıb.

Tədbir çərçivəsində keçirilən “Təbiətdən İlhamlanaraq Gənclərin İncəsənət Müsabiqəsi”ndə Mərkəzin benefisiarı Daniil Xəlilovun biomüxtəliflik mövzusunda çəkdiyi rəsm əsəri münsiflər heyəti tərəfindən 3-cü yerə layiq görülüb.