Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzinin təşkilatçılığı ilə Quba rayonunda “Bərabər addımlar” yay düşərgəsi fəaliyyətə başlayıb.

Gənclər və İdman Nazirliyinin dəstəyi ilə təşkil olunan düşərgəyə Mərkəzin həssas qruplara aid benefisiarları və onların valideynləri, Gənclər və İdman Nazirliyi tərəfindən əlilliyi olan 6 gənc daxil edilməklə, 80-dən çox iştirakçı cəlb edilib. Düşərgənin açılışı tədbirində Quba Rayon İcra Hakimiyyətinin, DOST İnklüziv İnkişaf və Yaradıcılıq Mərkəzinin, Gənclər və İdman Nazirliyinin nümayəndələri iştirak ediblər. Əvvəlcə Quba rayonundakı Şəhidlər xiyabanı və Şəhidlər Muzeyini ziyarət edilib.

Tədbirdə qeyd olunub ki, düşərgənin yaradılmasında məqsəd həssas kateqoriyalardan olan gənclərin cəmiyyətə adaptasiyasına dəstək vermək və inklüziv mühitdə yeni dostluq bağları qurmalarına şərait yaratmaqdır.

Bölgələrdə yaşayan həssas qrupların yaradıcılıq potensialının inkişafı və məşğulluq imkanlarının artırılması istiqamətində icra edilən layihələr vurğulanıb. Sonra Mərkəzin təlimçi və benefisiarlarının ifasında konsert proqramı təqdim edilib və təlimçilərinin iştirakı ilə bədii tikmə və muncuqla toxuma istiqaməti üzrə master-klass təşkil olunub.

İyulun 3-dək davam edəcək layihə çərçivəsində iştirakçıların asudə vaxtını səmərəli keçirməsi və sosial inteqrasiyası üçün müxtəlif proqramlar həyata keçiriləcək.