DOST İnklüziv İnkişaf və Yaradıcılıq Mərkəzi ilə “MER Group” MMC arasında “Birgə Əməkdaşlıq Müqaviləsi” imzalanıb.

Razılaşma sənədi Mərkəzin  İsmayıllıda yerləşən "DOST Evi" filialı ilə şirkət arasında "FOOD MOOD DOST Evi" layihəsi çərçivəsində kafe fəaliyyətinin həyata keçirilməsi üçün qarşılıqlı əməkdaşlığı nəzərdə tutur. 

Sənədi Mərkəzin direktoru Elnarə Ənsari və “MER GROUP” MMC-nin direktoru Babək Əliyev imzalayıb.

Qeyd olunub ki, əməkdaşlıq həssas əhali qrupuna aid olan şəxslərin həyat şəraitinin yaxşılaşdırılması və məşğulluq imkanlarının genişləndirilməsi sahəsində birgə təşəbbüsləri əhatə edir. Onların Mərkəzin fəaliyyət istiqamətləri ilə əlaqəli sahələrdə bacarıq va yaradıcılıq potensiallarının reallaşdırılmasına lazımi şərait yaradılacaq.

Əməkdaşlıq çərçivəsində Mərkəzin benefisiarları və həssas kateqoriyalardan olan digər şəxslər üçün güzəştli və ya pulsuz xidmət imkanları da nəzərdə tutulub.

Eyni zamanda texniki və logistik təşəbbüslərin həyata keçirilməsi, Mərkəz və filialların fəaliyyətinin tanıdılması, əl işləri üçün guşələrin qurulmasına imkanlar yaradılacaq.

“MER GROUP” MMC hazırda respublika üzrə 21 məntəqədə xidmət göstərir ki, onlardan 14-ü 24 saat fasiləsiz fəaliyyətdədir. Digər məntəqələr isə müəyyən iş saatları çərçivəsində əhaliyə xidmət göstərir.