Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzi İsmayıllı rayonu, Heydər Əliyev Mərkəzində “Cəmiyyətdə inklüzivlik” mövzusunda ictimai dinləmə keçirib.

İsmayıllı Rayon İcra Hakimiyyətinin dəstəyi ilə baş tutan tədbirdə rayonun təhsil və mədəniyyət ictimaiyyətinin nümayəndələri, qeyri-hökumət təşkilatlarının nümayəndələri, ictimai fəallar, şəhid ailəsi üzvləri və müharibə ilə əlaqədar əlilliyi olan şəxslər iştirak ediblər.

Tədbir iştirakçılarına DOST İnklüziv İnkişaf və Yaradıcılıq Mərkəzinin fəaliyyət istiqamətləri, Mərkəzin həssas əhali qruplarına aid istedadlı şəxslərin yaradıcı bacarıqlarının inkişafı və inklüziv cəmiyyətin formalaşdırılması istiqamətində həyata keçirdiyi layihələr haqqında ətraflı məlumat verilib.

Mərkəz üzvlərinin yerli və beynəlxalq tədbirlərdə uğurla təmsil olunmasından, həmçinin benefisiarların məşğulluğunun təmin edilməsi istiqamətində görülən işlərdən danışılıb.

Qeyd olunub ki, fəaliyyət müddətində Mərkəz və onun filialları 750-dən çox şəxsin sosiallaşmasına və cəmiyyətə inteqrasiyasına dəstək göstərib.

Tədbirdə həssas əhali qruplarından olan şəxslərin sosial inteqrasiyasına yönəlmiş layihələrə dair təqdimat edilib.

Mövzu ətrafında geniş müzakirələr aparılıb, iştirakçıların rəy və təklifləri dinlənilib.