Çilinin Azərbaycandakı səfirliyinin müvəqqəti işlər vəkili Xuan Karlos Salazar Alvares Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzində olub.

Qonağa 2021-ci ildə Prezident İlham Əliyev və birinci xanım Mehriban Əliyevanın iştirakı ilə açılışı olan Mərkəzin fəaliyyəti barədə məlumat verilib.

Mərkəzin direktoru Elnarə Ənsari həssas qruplara aid şəxslərin yaradıcılıq potensialının dəstəklənməsi üçün görülən işləri diqqətə çatdırıb. Həssas qruplara aid şəxslərin burada müxtəlif yaradıcılıq istiqamətləri üzrə təlimlər və sosial-psixoloji dəstək xidmətlərindən faydalandığı, Mərkəzin təlimçi və benefisiarlarının beynəlxalq səviyyədə qazandıqları uğurlar qeyd edilib.

Görüş zamanı həssas kateqoriyalara aid istedadlı şəxslərin yaradıcılığının tanıdılması və inklüzivliyin təşviqi məqsədilə birgə təşəbbüslərin gerçəkləşdirilməsi imkanlarına dair fikir mübadiləsi aparılıb.

Mərkəzin İnklüziv Kamera Orkestrinin ifası da təqdim edilib.

Xuan Karlos Salazar Alvares DOST İnklüziv İnkişaf və Yaradıcılıq Mərkəzi, buradakı inklüziv yaradıcılıq mühiti, hazırlanan sənət nümunələri barədə xoş təəssüratlarını bildirib, Mərkəzin xatirə kitabına ürək sözlərini qeyd edib.